مدونات ابناء الـــــدرادر دره النيل الابيض اداره النورحامد الريح

دكان ود الشايب:

دكان سليمان ود الشايب ..كان بمثل ركيزة مهمة في تلك الفترة -تلك الفترة مقصود بيها النص التاني من التمانينات- وكان عبارة عن منتدى رياضي ثقافي وبالتأكيد اجتماعي.... عن سليمان نفســـه شخصية ودودة جداً صديق لكل الأعمار.....يشاركك أدق تفاصيلك رغم الفارق السني.....باختصار كان صاحب الكل تماماً....
الموقع كان دكان محمد الخليل (أم حُمد ود الخليل) ..موقع استراتيجي تتقاطع ثلاثة شوارع رئيسية ... الجاي من الجنوب يوصلك شارع النص ...ومن الشرق يدخلك المسيد ...ومن الشمال يطلعك لي غاية الكورنة حقت كايدين وانتي ماشي شمال......... يعني كل الطرق كانت تؤدي إلى دكان ود الشايب..........
تسمية دكان يمكن ما تسوعب الحدث ...لأنو كان أكبر......مثلاً تجمع ناس الكوشتينة + ناس الكورة + وبعد كدة العشاء ..وفي تجمع ألذ كمان (ده بعرفو مهند ود الامام)
تطلع من البيت من غير ما تعرف بتلقى نفســـــك مسكت شارع النص ودخلت يمين بي شارع ناس اليقين ..مروراً بدكان حاج المبارك انتهاءً بدكان ود الشايب...