بال الكواريك الموضوع ده ما حقي ..لكن لقيته بالصدفة ..مشيت أجيب حاجة لقيت حاجة تانية المهم الموضوع ده عجبني بشكل وعارفة بعجب بنات حواء كلهن ..والكاتبو راجل :pتغيرت معايير الرجالة في زمنا العلينا دا..... الراجل حسي مارق من حوش الرجالة الزمان... والراجل الزمان حسي عوير وطيرة وداقس....الراجل زمان ان تحدث لعلع... وان مشى برطع... وان ضرب أوجع...كلمتو ما بتقع واطا ....... الراجل زمان ان اداك ما بيقول اديت... حسي ان اداك تاني يوم تلقاهو رابط لك جنب خشم البيت... وداير حقو .....الرجال زمان فيهم الراجل النضام... والراجل راجل اللطام... انواع الرجال مهما اتغيرت الدنيا ما بتغيرو.... راجل براي.. وراجل عديم راي... راجل ماسورة.... وراجل جنو كورة... راجل كواس.. وراجل زول دواس...وراجل تغيان فوق الفارغة وما عاجبنو الناس....راجل راسو قوي وعنيد... وراجل عمرو كبير وفهمو فهم وليِّد....راجل في الفارغة والمليانة يجوط... وراجل عيشتو سف الصعوط....راجل شين وحنكوش... وراجل رافعاهو الدنيا وهو ما يسوا برطوش...راجل لحمو ني وطري... وراجل مستور وضري...راجل ان لما فيك بالنضم يبارك بري.... ما تعرف تسدد اضنيك واللا تعضي طرف جلابتك في خشمك وتقوم جري....راجل كريم يعوج الدرب للضيف... وراجل داخلو كعب ووسخان وظاهرو نضيف...راجل مطلق الدنيا وعينو في الجبّانة...وراجل ان امنتو علي شي ما بيخاف الله فيك ولا في الامانة....راجل سرك يحفضو ويبقى فيهو عشرة.... وراجل ان وريتو اذتك باكر تلقاهو نشرا... راجل مستور حال.. وراجل شيال حال... راجل شيال تقيلة .. وراجل التقيلة تتور نفسو...راجل مطرطش.. وراجل من هم الدنيا كلو جروح ووشيهو مخبرش.....راجل يقابل الحارة بي سدرو... وراجل الحارة يديها عجاج كرعيهو...راجل نقناق.... وراجل عولاق...راجل شوفتو تريحك وتسُر... وراجل شوفتو تضوقك المُر.... راجل همو في كرشو.. وراجل ما يبنوم ان ما ضيوفو اتعشو..... راجل ما عليهو تكل... وراجل عليهو تتوكل.....راجل ان دُرتو تلقاهو...وراجل ان لقيتو اخير عدمو... قليل مروة وممحوق فهمو...راجل يسوا رجال الدنيا بي حالا... وراجل تمامة عدد ومضايقة للناس...راجل تقيل ما بينضم في الفارغة... وراجل الفارغة مالياهو من راسو لي كرعيهو...راجل يقالعك في حقك و حقو داسيهو....وقت الحاجة ما بيديك... ووقت حاجتو يجيك مدلدل راسو دايرك تديهو.... قفل الباب: يا اخواني البنات القدة عطشانة بدور الرجال البيحملو بطانة البجري نسيبتو ومرتو طلقانة
ليست هناك تعليقات:
إرسال تعليق