الــــــــــــــــــــــــدرادر دره النيل الابيض
الدرادر قريه شبه مدينه تقع على الضفه الشرقيه للنيل الابيض تبعد حوالى 27 كيلو متراًجنوب مدينه القطينه (جنه بلال او الجننت بلال محافظتنا الحبيبه) غربها قريه كدابه على الضفه الغربيه جنوبها قريه القراصه على بعد 3كيلو متر شرقها قريه كمبو عوض الله المهدى ابوسموره ( ابوسموره احد امراء المهديه ) جنوبها مشروع السعاده (الفطيسه سابقاً) يعود تاسيس هذه القريه الى التركيه السابقه كان اسمها قريه امان وكان للفكى ادريس درا در (قطاطى)
وكان الذى يريد الذهاب الى قريه امان يقول ماشى درادر الفكى ادريس ومن هنا جاء اسم الدرادر انها قريه ذات ارث حضارى وتاريخ عريق ومجد تليد قدمت شهداء للمهديه بقياده البطل الفكى ادريس تمساح الترك التحيه والرحمه له والى اجدادنا المجاهدين المخلصين امثال عبد الله ود الخليفه واخوانه الذين استشهدوا جميعاً فى معركه الدبه سابقاً (القراصه حالياً) وحتى فى عهدنا هذا لم تبخل با الشهداء لقد قدمت احدشهداء الانقاذ الشهيد ادريس الخير حاج ادريس هذا الشبل من ذاك الاسد والذى كان يعمل مدير مصرف فى مدينه المناقل سكانها يعمل قليل منهم با الزراعه وموظفين بالدوله كمهنه التدريس التى لها النصيب الاكبر والزراعه مقتصره على البساتين وتربيه الابقار والتى انشرت فى الاونه الاخيره بها 2 مدرسه للاساس تاسستا عام 1956 و2مدرسه ثانويه عليا وبها مركز صحى ونادى رياضى ثقافى تاسس عام 1955 وافتتح بحفل فى عام 1956 احياءه عبد العزيز محمد داؤد ورمضان زائد غفر الله لهما وبها 4 مساجد وهم مسجد الدرادر الكبير ومسجد شيخ بابكر الحسن ومسجد عمر على عمر ومسجد فاعل خير الذى اشرف على بناءه العميد يوسف المهدى حاج ادريس بها مقسم للاتصلات بها 3 ابار ارتوازيه للمياه وكهرباء موصله من القطينه
بمسكها من الكبرى بس مابروح برى.الدرادر وبس
وانت داخل من قدام عند الكبرى جاااى من كمبو عوض الله المهدى الدرادر.
جميله المنظر اشجار النيم
كل القرى فى النيل الابيض تتشابه
الا الدرادر بتنفرد بالجمال جمال المنظر جمال الناس جمااال الطباع
ملكهم خايل الدرادر على النيل.
الدرادر اى شى فيها جميل
وان كنت من غير سكان الدرادر
اياك ان تزورها...ولانك
انفعلت ستكسر (ركبه) ثم تتزوج وتصبح واحد من اهلها كما حصل فعلاً .
ولاتشابهها فى هذه الخاصيه الا القطينه جنه بلال .
نبدا بالحى الامامى جوار الاسبتاليه
اى فريق قدام جوار المركز الصحى بابكر ود حاج الطاهر
والحوش الحدادى مدادى والاغتراب
فى الكويت ورشه الحوش بالاسفلت جميله
فى ذلك الزمان والمكان الذى كنا نحن صغاااار
نجى نتفرج فى رشه الحوش والبوابه الجميله
اللون الاسود بالابيض قمه الروعه .
تنظر الى يمينك حوش عمنا فكى الطيب ودالبشير
ذلك الرجل الحافظ لكتاب الله ذو الوجه الصبوح
وتكاد لاتفارقه الابتسامه له الرحمـــــــــه ابنه ادريس
مطلع الطربيزه وصوت الفاره والمنشااار يشدو
ويزيد المكان روعه وحركه الناس فى الشفخانه
انذاااك المركز الصحى الان الملاريا هارسه
البلد واحد نايم فى الكنبه واخر على عربه الكارو
جااااى من خارج الدرادر واحد منتظر
قاسم الصديق يادكتور يالا تعاااال معاااى
البيت ادى ابوى الحقنه او ارسل معااااى مقبول بشاره.
له الرحمه قاسم الصديق ايضاً الرحمه لك اخى( ابو ياسين )
مقبول بشاره الكل فارق هذه الدنيا المساعد الطبى
قاسم الصديق ومساعده مقبول بشاره .
ومن قبلهم الطيب زهران
وحسن النعيم لهم الرحمه جميعاً
الـــــدرادر بلد سمحه شديد وانا شخصيا حبيتها
وحبيت شوارعها وخااااصه شاااارع النص .
هناااك فى اخر شارع النص بص العم المهدى ودحاج ادريس
واقف وشايف تغوه وهى صغيره شايله الاكل للمساعديه
والمساعدى الكبير يابت ختى الاكل جيبى مويه باااارده من الزير
تجى ماشى بجنب دكان حاج البدوى
اقابلك ابوعلى محمد الحسن ودسوبا
وهو سايق سياره بخشمه ورابط كوز عينه
تراه يترنح يمين شمااال شمااااال يمين يترنح فى الميلان
لكى لاتنقلب السيااااااره
والله يوحى لك كانه سايق لورى وهذا اللورى
محمل تقيل وصوت الكوز والميلان
وكأن الدنيا خريف له الرحمه ابوعلى .
شويه يقول لك بعرق ولا بى ايه والا
الحكـــــــــــومه الانقلبت دعاااااايه
وانت ماشى على دكان دروس تقابلك امنه ام الباقر
وتخصمك الرسول الرسول الجبنه جاااااهزه وحاااااات الباقر
كان تدخل تاخد ليك فنجال تجبر باالخاطر تدخل
اقابلك ابوشرار والمصطفى ود المادح والدليب لهما التحيه
وللدليب الرحمه.
والــدرادر تتوسط المسافه بين الخرطوم والدويم
واخيرا سلام ياناس الدرادر ان شاء الله المويه متوفره والكهرباء ماقاعده تقطع عشان الوليدات جايين يصيفوا معاكم
وانا بجمع فى ذكريات الدرادر تذكرت ودالرضيه وله اقول:
ود الرضيه سكنت جده ام جداد
ولانك فى جده وجده غير وفى جده كل خير
ارجو ان تكمًل عن الدرادر وتبدا باهلك الراقيين الظراف عرب الحسن ,وتلف تمشى فريق الشوق وعرب الفكى وعرب الخضر والخمجن وبانت
السكان من قبيله الحسانيه فخذ الصلاحيه ويتكلمون اللغه الدرادرابيه
__________________
شوقتنا للزيارة
ردحذفياسلام مزيد من التقدم والإزدهار لاجمل قرية حضارية
ردحذف